Римјаните

Секој човек нека им се покорува на властите над него, зашто нема власт што не е од Бог, а постојните власти се поставени од Бог.

Затоа оној што ѝ се противи на власта ѝ се противи на Божјата одредба, а оние што се противат ќе навлечат осуда врз себе.

Владетелите не се причина за страв кај оние што прават добро, туку кај оние што прават зло. Сакаш ли да не се плашиш од власта? Прави добро, и ќе добиеш пофалба од неа.

Таа е Божја слугинка за твое добро. Но ако правиш зло, плаши се, зашто не го носи мечот залудно. Таа е Божја слугинка, која го извршува гневот врз оној што прави зло.

Затоа треба да се покорувате, не само поради казната, туку и поради совеста.

Поради тоа плаќате и даноци, зашто властите се Божји служители, кои постојано се занимаваат со таа служба.

Дајте му го секому она што му го должите: кому данок – данок; кому царина – царина; кому почит – почит; кому чест – чест.

Не должете никому ништо, освен да се љубите еден со друг, зашто оној што го љуби ближниот го исполнил Законот.

Зашто заповедите: „Не прави прељуба“, „Не убивај“, „Не кради“, „Не посакувај“ – и секоја друга заповед – се опфатени во оваа заповед: „Љуби го својот ближен како себеси.“

Љубовта не му прави зло на ближниот. Затоа љубовта е исполнување на Законот.

Правете го тоа, знаејќи го времето: веќе е час да се разбудите од сон, зашто сега спасението ни е поблиску отколку кога поверувавме.

Ноќта одмина, а денот се приближи. Затоа да ги отфрлиме делата на темнината и да се облечеме во оружјето на светлината.

Да живееме чесно, како дење – не во гозби и пијанства, не во разврат и разузданост, не во караници и завист.

Туку облечете се во Господ Исус Христос и не правете планови како да ги задоволувате телесните похоти.