Римјаните

Ние, силните, должни сме да ги носиме слабостите на немоќните, а не да си угодуваме себеси.

Секој од нас нека му угодува на својот ближен за негово добро, за да се изградува.

Зашто и Христос не Си угодуваше Себеси, туку, како што е напишано: „Навредите на оние што Те навредуваат паднаа врз Мене.“

Сѐ што е напишано порано, напишано е за наша поука, за преку истрајноста и утехата од Писмата да имаме надеж.

А Бог на истрајноста и утехата нека ви даде да живеете во слога еден со друг, во согласност со Христос Исус,

за еднодушно и со една уста да Го славите Бог и Таткото на нашиот Господ Исус Христос.

Затоа примајте се еден со друг, како што и Христос ве прими вас, за Божја слава.

Ви велам дека Христос стана служител на обрежаните заради Божјата вистина, за да ги потврди ветувањата дадени на татковците,

а незнабожците да Го прослават Бог поради Неговата милост, како што е напишано: „Затоа ќе Те исповедам меѓу незнабожците и ќе го воспевам Твоето име.“

И повторно вели: „Радувајте се, незнабожци, заедно со Неговиот народ.“

И пак: „Фалете Го Господ, сите незнабожци, и нека Го слават сите народи.“

А Исаија повторно вели: „Ќе се појави Коренот на Јесеј, Оној Кој ќе се издигне за да владее над народите; во Него народите ќе се надеваат.“

А Бог на надежта нека ве исполни со сета радост и мир во верата, за да изобилувате во надежта преку силата на Светиот Дух.

Мои браќа, и јас самиот сум уверен за вас дека сте исполнети со добрина, со секое знаење и дека можете еден со друг да се поучувате.

Сепак, за некои работи ви пишував посмело, за повторно да ве потсетам, поради благодатта што ми е дадена од Бог

да бидам служител на Христос Исус меѓу незнабожците, вршејќи ја свештеничката служба на Божјото Евангелие, за незнабожците да станат угоден принос, осветен од Светиот Дух.

Затоа во Христос Исус имам со што да се пофалам во службата пред Бог.

Не би се осмелил да зборувам за нешто освен за она што Христос го изврши преку мене, за да ги доведе незнабожците до послушност – со збор и дело,

со сила на знаци и чуда, со силата на [Божјиот] Дух. Така, од Ерусалим и сѐ до Илирик, целосно го проповедав Евангелието на Христос.

Настојував да го проповедам Евангелието таму каде што името на Христос уште не беше познато, за да не градам врз туѓ темел,

туку, како што е напишано: „Оние на кои не им беше говорено за Него ќе видат, а оние што не чуле ќе разберат.“

Затоа многупати бев спречен да дојдам кај вас.

Но сега, бидејќи повеќе немам поле за работа во овие краишта, а веќе многу години копнеам да дојдам кај вас,

се надевам дека ќе ве видам кога ќе тргнам за Шпанија и дека ќе ми помогнете да го продолжам патот дотаму, откако најнапред барем малку ќе уживам во вашето друштво.

А сега одам во Ерусалим, за да им послужам на светите.

Зашто Верниците во Македонија и Ахаја доброволно решија да соберат прилог за сиромашните меѓу светите во Ерусалим.

Тие доброволно го направија тоа, но и им се должници. Зашто, ако незнабожците станаа соучесници во нивните духовни блага, должни се да им послужат и со материјални блага.

Кога ќе го завршам тоа и ќе им го предадам собраниот прилог, ќе тргнам преку вас за Шпанија.

А знам дека, кога ќе дојдам кај вас, ќе дојдам со полнотата на благословот на Христос.

Ве молам, [браќа], преку нашиот Господ Исус Христос и преку љубовта на Духот, борете се заедно со мене, молејќи Му се на Бог за мене,

да бидам избавен од непослушните во Јудеја и мојата служба во Ерусалим да биде добро примена од светите.

Така, по Божја волја, да дојдам кај вас со радост и заедно со вас да се одморам.

А Бог на мирот нека биде со сите вас. Амин.