Римјаните

И така, оправдани преку вера, имаме мир со Бог преку нашиот Господ Исус Христос.

Преку Него добивме и пристап [преку вера] до оваа благодат во која стоиме, и се радуваме во надежта за Божјата слава.

И не само тоа, туку се радуваме и во неволјите, знаејќи дека неволјата создава истрајност,

истрајноста – проверен карактер, а проверениот карактер – надеж.

А надежта не разочарува, зашто Божјата љубов е излеана во нашите срца преку Светиот Дух, Кој ни е даден.

Зашто, додека уште бевме немоќни, Христос во определеното време умре за безбожниците.

Едвај некој би умрел за праведен човек, иако за добар човек можеби некој би се осмелил да умре.

Но Бог ја покажа Својата љубов кон нас со тоа што Христос умре за нас додека уште бевме грешници.

Затоа, откако сега сме оправдани со Неговата крв, уште повеќе преку Него ќе бидеме спасени од Божјиот гнев.

Зашто, ако додека бевме непријатели се помиривме со Бог преку смртта на Неговиот Син, уште повеќе, откако сме помирени, ќе бидеме спасени преку Неговиот живот.

И не само тоа, туку се радуваме во Бог преку нашиот Господ Исус Христос, преку Кого сега го примивме помирувањето.

Затоа, како што преку еден човек гревот влезе во светот, а преку гревот смртта, така смртта се прошири на сите луѓе, бидејќи сите згрешија.

Гревот беше во светот и пред Законот, но гревот не се припишува кога нема Закон.

Сепак, смртта царуваше од Адам до Мојсеј и над оние што не згрешија на ист начин како Адам, кој е предобраз на Оној што требаше да дојде.

Но дарот не е како престапот. Зашто, ако поради престапот на еден човек мнозина умреа, уште повеќе Божјата благодат и дарот што дојде преку благодатта на еден Човек, Исус Христос, изобилно се излеаја врз мнозина.

Дарот не е како последицата од гревот на еден човек: судот по еден престап донесе осуда, а дарот по многу престапи донесе оправдување.

Ако поради престапот на еден човек смртта царуваше преку тој еден, уште повеќе оние што го примаат изобилството на благодатта и дарот на праведноста ќе царуваат во животот преку Единиот – Исус Христос.

Значи, како што преку еден престап дојде осуда врз сите луѓе, така преку едно праведно дело дојде оправдување што носи живот за сите луѓе.

Како што преку непослушноста на еден човек мнозина станаа грешници, така преку послушноста на Единиот мнозина ќе станат праведни.

Законот дојде за престапот да се умножи; но каде што се умножи гревот, благодатта уште повеќе изобилуваше,

та како што гревот царуваше преку смртта, така и благодатта да царува преку праведноста за вечен живот, преку Исус Христос, нашиот Господ.