Захарија

Отвори ги, Ливане, своите порти и оган нека ги проголта твоите кедри.

Плачи, кипарисе, зашто падна кедарот, зашто и великаните се опустошени; ридајте, дабови васански, бидејќи е провалена непроодната планина.

Се слуша гласот од плачењето на пастирите, бидејќи е опустошено нивното велелепие; се слуша рикањето на лавовите, зашто е опустошена убавината на Јордан.

Така вели Господ Бог, мојот Бог: паси ги овците, определени за клање,

кои купувачите ќе ги колат без пречка, а продавачите ќе им велат: „нека е благословен Господ; се збогативме!“ И нивните пастири нема да ги жалат.

Зашто Јас веќе нема да им простувам на жителите од земјата, вели Господ; ете, ќе ги предадам луѓето, секого во рацете на неговиот ближен и во рацете на неговиот цар, и тие ќе ја поразуваат земјата, а Јас нема да ги избавувам од нивните раце.

И ќе ги пасам овците во Хананската земја, определени за клање, најбедните овци. И ќе земам два стапа, едниот го нареков „Милост“, а другиот „Единство“; со нив ќе ги пасам овците.

И ќе истребам тројца од пастирите во еден месец и ќе се одврати Мојата душа од нив, зашто и нивната душа ќе се одвраќа од Мене.

Тогаш ќе речам: нема да ве пасам; онаа што умира, нека умре, и која загинува, нека загине; и тие, пак, што ќе останат нека се изедат една со друга.

И така ќе го земам Својот стап благоволение и ќе го прекршам, за да го уништам заветот што го склучив со сите народи.

И тој ќе биде уништен во оној ден, и тогаш ќе разберат сиромашните овци, кои Ме очекуваат, дека ова е збор од Господ.

И ќе им речам: ако ви е угодно, дајте Ми ја Мојата награда; ако, пак, не - не давајте Ми ја; и тие Ми одредија плата триесет сребреници.

А Господ ми рече: стави ги во храмската ризница - тоа е висока цена, со која ме оценија. И јас ги зедов тие триесет сребреници и ги фрлив во Господовиот дом за грнчарот.

Го скршив и Својот друг стап - вериги, за да го раскинам братството меѓу Јуда и Израелот.

И ми рече Господ: земи си уште нешто од пастирската опрема.

Оти, ете, Јас ќе поставам пастир на оваа земја, кој нема да се грижи за оние што загинуваат, нема да ги бара загубените и болните нема да ги лекува, здравите нема да ги храни, а месото од згоените ќе го јаде, копитата, пак, ќе им ги откинува.

Тешко му на овој мрзлив пастир, што го остава стадото! Меч ќе му стои над неговата рака и над неговото десно око! Раката наполно ќе му се исуши, и неговото десно око наполно ќе потемнее.