Захарија

Ете, настапува Господовиот ден кога ќе го разделат ограбеното од тебе пред тебе.

Ќе ги соберам сите народи во војна против Ерусалим; градот ќе биде преземен, и домовите разгребени; жените ќе бидат обесчестени, половината од градот ќе отиде во ропство; но останатиот народ нема да биде истребен од градот.

Тогаш ќе излезе Господ и ќе се сврти против тие народи, како што војуваше во борбен ден.

И ќе застанат Неговите нозе на Елеонската Гора во оној ден, што се наоѓа спротив Ерусалим од источната страна: и ќе се расцепи Елеонската Гора од исток кон запад со многу голема долина и половината ќе појде кон север, а втората половина кон југ.

И вие ќе побегнете во долината на Моите гори, зашто планинската долина ќе се протега до Асил; а ќе побегнете како што бегавте од земјотресот во деновите на Озија, царот Јудејски; и ќе дојде Господ, мојот Бог, и сите светии со Него.

Во тој ден нема да има светила, светилата ќе бидат премавнати.

Тој ден ќе биде единствен, познат само на Господ; ниту ден, ниту ноќ - само приквечер ќе се појави светлина.

Во тој ден ќе потечат живи води од Ерусалим, половина кон источното море, а половина кон западното море; така ќе биде и лете и зиме.

И Господ ќе биде Цар над целата земја; во тој ден Господ ќе биде единствен и Неговото име - едно единствено.

Целата таа земја ќе биде како рамнината од Гаваон до Ремон, јужно од Ерусалим, кој се извисил на своето место и кој ќе се насели од портите Венијаминови до местото на првите порти, до Агловите порти, и од кулата на Ананеила до царските визби.

И ќе се населат во него, и проклетство нема да има повеќе, а Ерусалим ќе се наоѓа во безопасност.

И ете какво ќе биде казната со која Господ ќе ги порази сите народи, кои војувале против Ерусалим - телото на секого од нив ќе се исуши уште додека стои на своите нозе, и очите ќе му се стопат во длабнатините, и јазикот ќе му се исуши во неговата уста.

И во тој ден ќе завладее голем смут од Господ, така што еден со друг ќе се фаќаат за рака и секој ќе ја подига својата рака против раката на својот ближен.

Но и Јуда самиот ќе војува против Ерусалим, и богатството на сите околни народи ќе биде собрано: злато, сребро и облеки во голем број.

Таков пораз ќе има и над коњите и мазгите, камилите и ослите, и над секаков добиток, што ќе се наоѓа во нивните куќи.

А потоа сите други што доаѓаат во Ерусалим, од сите народи, ќе доаѓаат од година во година, за да се поклонат на Царот, на Господ на небесните војски, и да го празнуваат празникот Сеници.

И, ако некое од племињата земни не појде во Ерусалим, за да Му се поклони на Царот, на Господ на небесните војски, дожд нема да падне кај нив.

И, ако племето египетско не тргне на пат и не дојде тука, и тоа нема да добие дожд, па ќе го постигне пораз, со каков ги порази Господ оние народи, што не доаѓале да го празнуваат празникот Сеници.

Ете што ќе стане за гревот на Египет и за гревот на сите народи, кои нема да дојдат да го празнуваат празникот Сеници.

Во тоа време дури на уздите од коњите ќе биде забележано „Свето на Господ“, и котлите во Господовиот дом ќе бидат како жртвените садови пред жртвеникот.

И сите котли во Ерусалим и во Јуда ќе бидат Свето на Господ на небесните војски, и ќе доаѓаат сите што принесуваат жртва, ќе ги земат и ќе варат во нив, и нема повеќе да има ниту еден Хананеец во домот на Господ на небесните војски во тој ден.