Захарија

И пак ги подигнав очите и видов: и, ете, еден маж, кој во раката имаше мерно јаже.

Го прашав: „Каде одиш?“ Тој ми рече: одам да го измерам Ерусалим, за да видам колкава му е ширината и колкава му е должината.

Тогаш ангелот, што зборуваше со мене, излезе, а друг ангел му дојде во пресрет,

и тој му рече на оној: Побрзај и кажи му на овој млад човек - Ерусалим ќе се насели по селата поради многуте луѓе и добиток во него.

„И Јас ќе му бидам огнен ѕид околу него, вели Господ, и ќе се прославам во него.

Еј, еј! Бегајте од северната земја, вели Господ, зашто Јас ќе ве соберам од четирите ветра небески, вели Господ.

Спасувај се, Сионе, ти што живееш кај Вавилонската ќерка.

Зашто така вели Господ Седржителот, Кој ме прати за слава меѓу народите, што ве пљачкосуваа: зашто кој ќе се допре до вас, ќе се допре до зеницата на Моето око.

И, ете, Јас ќе ја кренам Својата рака против нив, и тие ќе станат плен на своите слуги.“ Тогаш ќе познаете дека Господ на небесните војски ме пратил.

„Ликувај и весели се, Сионова ќерко, зашто ете, Јас ќе дојдам и ќе се населам во тебе“, вели Господ.

И многу народи ќе се придружат кон Господ во оној ден и ќе станат Негов народ. И Тој ќе се насели меѓу тебе, и тогаш ќе разбереш дека Господ на небесните војски ме испратил кај тебе.

Тогаш Господ ќе го земе во владение Јуда, Својот дел на светата земја, и пак ќе го избере Ерусалим.

Нека молчат сите луѓе пред лицето на Господ, зашто Тој стана во облаците од Своето свето живеалиште.