Захарија

Потоа ми го покажа тој Исус, првосвештеникот, кој стоеше пред Господовиот ангел, и сатаната, кој стоеше од неговата десна страна, за да му се противи.

И му рече Господ на сатаната: „Господ да те укори, Господ да ти забрани, Оној Кој го избра Ерусалим. Зар не е Тој гламја истргната од оган?“

А Исус беше облечен во извалкана облека и стоеше пред ангелот,

кој им рече на оние што стоеја пред него: „Соблечете ја од него извалканата облека; а нему му рече: ете, ја отфрлив од тебе твојата вина и те облекувам во свечена облека.“

Потоа рече: „Ставете му чист турбан на главата.“ И му ставија чист турбан на главата и го облекоа во свечена облека, а Господовиот ангел стоеше.

И Господовиот ангел, сведочејќи, му рече на Исус:

вака вели Господ на небесните војски: „Ако одиш по Моите патишта и ако ја извршуваш Мојата служба, ќе му судиш на Мојот дом и ќе ги пазиш Моите дворови. И Јас ќе ти дозволам да одиш меѓу тие луѓе што стојат овде.

Но, послушај, Исус, првосвештенику, ти и твоите браќа, што се пред твоето лице, зашто тие луѓе се познати. Еве, Јас ќе го доведам Својот слуга - Изданокот.

Оти, ете, тој е каменот што го поставувам пред Исус, на тој единствен камен има седум очи; ете, Јас ќе го изделкам на него натписот, вели Господ на небесните војски, и ќе ја простам вината на оваа земја во еден ден.“

Во тој ден, вели Господ на небесните војски, ќе се поканувате еден со друг под лозата и под смоквата.