Захарија

Пак ги подигнав своите очи и гледам: а таму, ете, излегуваат четири коли со коњи од еден дол меѓу две планини, а тие планини беа од бакар.

Кај првата кола коњите беа црвеникави, кај втората црни;

кај третата кола коњите беа бели, а кај четвртата кола - сиви и силни.

Проговорив и му реков на ангелот, што зборуваше со мене: „А што значи ова, мојот господине?“

Ангелот одговори и ми рече: тоа се четирите небесни духа, кои излегуваат да се претстават пред Господ над целата земја.

Враните коњи излегуваа кон северната страна, а белите одеа по нив, додека сивите коњи одеа кон јужната страна.

Излегоа и силните, па се впуштија да ја обиколат земјата; и тој им рече: ‚обиколете ја земјата‘, и тие ја обиколија.

Тогаш тој ме повика и ми рече: ете, оние што отидоа кон северната страна, го успокоија Мојот дух против северната страна.

И повторно ми дојде Господовиот збор:

земи од дојдените робја, од Халдеја, од Товија и од Једаја, и тргни истиот ден, па дојди во домот на Јосија, синот на Софонија, каде што тие пристигнаа од Вавилон.

Земи од нив сребро и злато, па направи венци, и стави ги на главата на Исус, синот на Јоседек, првосвештеникот,

и речи им: вака вели Господ на небесните војски: „Ете, маж, името Му е Изданок, Тој ќе израсне од својот корен и ќе го изгради Господовиот храм.

Тој ќе го изгради Господовиот храм и ќе се прослави, ќе седне на својот престол и ќе биде владетел, ќе биде и свештеник на својот престол, и ќе има согласност за мир меѓу едниот и другиот.

А венци ќе бидат за Хелем и Товија, за Једаја и Хена, синот на Софонија, како спомен во Господовиот храм.

И оддалеку ќе дојдат луѓе, што ќе учествуваат во градењето на храмот, и вие тогаш ќе разберете, дека Господ на небесните војски ме испратил кај вас, и сето тоа ќе се изврши, ако искрено го послушате гласот на вашиот Господ Бог.“