Захарија

Пророчкиот збор на Господ е против земјата Хадрах, и во Дамаск ќе се задржи, зашто окото Господово ги набљудува сите луѓе, како и сите колена Израелеви;

тоа е и над Емат, кој се граничи со него, и е над Тир и Сидон, зашто тие станале многу лукави.

Тир изградил тврдина, натрупал сребро како прашина, и злато како улична кал.

И, ете, Господ ќе го направи беден и ќе му ја скрши силата во морето, а и самиот ќе биде истребен со оган.

Тоа ќе го види Аскалон, и ќе се уплаши, а и Газа - па и таа ќе затрепери многу, и Екрон, зашто ќе се засрами неговата надеж: нема да има цар во Газа, и Аскалон нема да се насели.

Туѓо племе ќе живее во Азот, и Јас ќе ја уништам гордоста на Филистејците.

Ќе ја извлечам крвта од нивната уста, нечистотијата од нивните заби и тие ќе паднат пред нашиот Бог и ќе бидат како водачи во Јуда, а Екрон ќе биде како Јевусеј.

Ќе поставам стража околу Мојот дом против војската, против оние, кои преминуваат натаму и наваму, и нема повеќе да доаѓа непријател; зашто сега Јас ќе го гледам со Своите очи.

Ликувај од радост, Сионова ќерко, извикувај, Ерусалимска ќерко; ете, твојот Цар доаѓа кај тебе, праведен е и победоносен, кроток, седнат на осле, младо осле.

Тогаш ќе ги истребам колите на Ефрем и коњите на Ерусалим, и ќе се скрши убојниот лак; и Тој ќе објави мир на народите, и Неговото царство ќе се протега од море до море и од реката до краиштата на земјата.

А што се однесува до тебе, Израеле, заради крвта на заветот Јас ги пуштив затворените од ровот, каде што нема вода.

Враќајте се во тврдината вие затворените, кои се надевате! А сега што ќе воспоставам, ќе ти дадам двојно.

Зашто како лак ќе го затегнам Јуда и лакот ќе го наполнам со Ефрем, па ќе ги подигнам твоите синови, Сионе, против твоите синови, Еладо и тебе ќе те направам како меч јуначки.

Ќе се појави над нив Господ и како молскавица ќе излета Неговата стрела; ќе загрми Господ Бог со трубата и ќе појде кон јужните бури со гласот на Својот гнев.

Господ на небесните војски ќе ги брани, и тие ќе истребуваат и ќе ги газат дури и камењата за праќки; ќе пијат крв како вино; и ќе се наполнат како жртвени чаши, како аглите на жртвеникот.

И нивниот Господ Бог ќе ги спаси во оној ден, како стадо од Својот народ; зашто тие ќе заблескаат како камења на круна во Неговата земја.

О, колку голема ќе биде неговата доброта и каква ќе биде неговата убавина. Житото ќе ги весели момците, и виното девојките.