Софонија

Господовиот збор што му дојде на Софонија, синот на Хусија, син на Годолиј, син на Амариј, син на Езекија, во деновите на Јосија, син на Амон, Јудиниот цар.

Сѐ ќе истребам од земјата - вели Господ;

Ќе ги истребам луѓето и добитокот, небесните птици и морските риби, и сѐ што наведува на грев, заедно со безбожниците. Ќе ги отстранам луѓето од лицето на земјата“, вели Господ.

И ќе ја протегнам Својата рака над Јуда и над сите жители на Ерусалим; ќе ги истребам од тоа место остатокот од Ваал, името на идолските свештеници со свештениците,

И оние што на покривите се поклонуваат на небесната војска, и оние што Му се поклонуваат на Господ и се колнат во Него, а истовремено се колнат и во Молох,

како и оние што отстапија од Господ, не Го бараат Господ ниту прашуваат за Него.

Замолкни пред Господ Бог, зашто близу е Господовиот ден. Господ веќе ја подготви жртвата и ги посвети Своите поканети гости.

Во денот на Господовата жртва Јас ќе ги посетам владетелите, синовите на царот и сите што се облекуваат во туѓинска облека;

ќе ги посетам во оној ден сите што го прескокнуваат прагот и го исполнуваат домот на својот Господ со насилство и измама.

Во тој ден“, вели Господ, „ќе се слуша вик од Рибната Порта, ридање од Втората населба и силен трескот од ридовите.

Плачете жители од долниот дел на градот, зашто ќе исчезнат сите трговци; истребени ќе бидат сите што носат сребро.

Во тоа време ќе го пребарам Ерусалим со светилки и ќе ги казнам луѓето што лежат врз својот вински талог и во срцето велат: ‚Господ нема да направи ни добро ни зло“.

Нивното богатство ќе стане плен, а нивните куќи ќе бидат опустошени. Ќе градат куќи, но нема да живеат во нив; ќе садат лозја, но нема да пијат вино од нив.

Близу е големиот Господов ден, близу е и доаѓа многу брзо! Слушнете го гласот на Господовиот ден! Тогаш и јунакот горко ќе извика.

Тој ден е ден на гневот, ден на жалост и на тескоба, ден за запустување и уривање, ден на темнина и на мрак, ден облачен и маглив,

ден на труба и на боен повик против утврдените градови и високите кули.

Ќе ги доведам луѓето во неволја, па ќе одат како слепи, зашто згрешија против Господ. Нивната крв ќе биде расфрлена како прав, а нивните тела како измет.

Ниту нивното сребро, ниту нивното злато нема да може да ги спаси во денот на Господовиот гнев, а од огнот на Неговата ревност ќе биде уништена таа земја, и тоа ќе биде ненадеен крај на сите нејзини жители.