Софонија

Приберете се, приберете се внимателно, бесрамен народе,

додека уште не е дојден судот - денот ќе мине како трици, додека уште не е дојден над вас Господовиот жесток гнев, додека не настапил денот на Господовиот гнев.

Побарајте го Господ, сите смирени на земјата, вие што ги извршувате Неговите закони; побарајте ја правдата, побарајте го смирението; можеби ќе се сокриете во денот на Господовиот гнев.

Зашто Газа ќе биде напуштена и Аскалон ќе запусти, Ашдод ќе биде изгонет среде ден, а Екрон ќе се искорени.

Тешко им на жителите од приморскиот крај, на Керетејски народе! Господовиот збор е над вас, Хананејци, филистејска земјо! Јас ќе те истребам, и во тебе нема да има жители.

Па ќе стане приморскиот крај пасишта со овчарски колиби и трла.

И тој крај ќе му се падне на остатокот од Јудиниот дом, и ќе пасат таму и во куќите на Аскалон вечерта ќе ја поминуваат, зашто Господ, нивниот Бог, ќе ги посети и ќе ја обнови нивната благосостојба.

Го чув хулењето на Моав и навредите од Амонците, како се подигруваат со Мојот народ и како се шират во неговите предели,

Но жив сум Јас, вели Господ на небесните војски, Израелевиот Бог: Моав ќе биде како Содом, и Амонците ќе бидат како Гомор, земја на коприви, солена јама, пустина за навек; остатокот од Мојот народ ќе ги плени, и оние што ќе останат од Мојот народ, ќе ги наследат.

Тоа ќе им биде за нивната гордост, зашто се подигруваа и се издигнуваа против народот на Господ на небесните војски.

Страшен ќе биде за нив Господ: Тој ќе ги истреби сите богови на земјата, и Нему ќе Му се поклонат - сите од своите места, сите краишта на народите.

И вие, Етиопјани, ќе бидете поразени од Мојот меч.

Господ ќе ја протегне Својата рака на север, ќе ја уништи Асирија, а Ниневија ќе ја претвори во урнатина, во место суво како пустина,

и стада ќе лежат по неа и секаков вид животни: був и еж ќе ноќеваат во нејзините столбови; нивниот глас ќе се разнесува низ прозорците, уривањето ќе се покаже на столбовите од вратите, зашто на нив нема да има облоги од кедар.

Ете што ќе стане веселиот град, кој живееше безгрижно и во своето срце си вели: „Јас сум и нема друг освен мене.“ Како ќе стане урнатина, легло за диви животни! И секој што ќе помине покрај него, ќе потсвирне и ќе мавне со раката.