Софонија

Тешко му на непокорниот, осквернет и насилнички град!

Не слуша глас, не прифаќа поука, не се надева на Господ, не се приближува до Својот Бог.

Неговите владетели се како лавови што рикаат, неговите судии - вечерни волци, кои до утрината не оставаат ниту една коска.

Неговите пророци се дрски и неверни луѓе; неговите свештеници го осквернуваат светилиштето и го прекршуваат Законот.

Господ е праведен среде него, не врши неправедност, секое утро ја објавува Својата правда на видело, но неправедниот не знае за срам.

Јас ги истребив народите; нивните утврдени кули се разурнати. Ги опустив нивните улици, така што никој не минува по нив; нивните градови се запустени, без човек и без жител.

Јас реков: „Само плаши се од Мене и прими поука!“ Тогаш неговото живеалиште немаше да биде уништено, според сето она што го определив за него. Но тие упорно ги расипуваа сите свои дела.

Затоа чекајте Ме, вели Господ, до денот кога ќе станам да го земам пленот; зашто Моја одлука е да ги соберам народите и да ги свикам царствата, за да го излијам врз нив Својот гнев, сета жестина на Мојот гнев; зашто во огнот на Мојата ревност ќе биде проголтана целата земја.

Тогаш ќе им дадам на народите чисти усни, сите да го повикуваат името на Господ и еднодушно да Му служат.

Од другата страна на реките на Куш, Моите поклоници, Моите расеани, ќе Ми принесат дарови.

Во тој ден нема да се срамуваш поради сите свои дела со кои згреши против Мене, зашто тогаш ќе ги отстранам од твојата средина оние што се фалат со својата гордост; и нема повеќе да се воздигнуваш на Мојата света планина.

Но ќе оставам среде тебе понизен и сиромашен народ, и тие ќе се надеваат на Господовото име.

Израелевиот остаток нема да врши неправедност ниту да зборува лага, и во нивната уста нема да се најде измамлив јазик, зашто сами ќе си пасат и ќе лежат, и никој нема да ги вознемирува.

Радувај се, Сионова ќерко, воскликнувај, Израеле, весели се и радувај се од сѐ срце, Ерусалимска ќерко:

Господ ја одмени пресудата над тебе, го изгони твојот непријател. Господ, Израелевиот Цар, е среде тебе: нема повеќе да видиш зло.

Во оној ден ќе му речат на Ерусалим: „Не плаши се“ и на Сион: „Нека не ослабнат твоите раце.“

Господ, твојот Бог, е во твојата средина. Тој е силен да те спаси; ќе се развесели за тебе со радост, ќе те смири во Својата љубов, ќе се радува за тебе со песни.

Оние што тагуваат за празничните собири, Јас ќе ги соберам; оние што ти припаѓаат, за кои срамот беше товар.

Ете, Јас ќе ги притеснам сите твои мачители во она време, ќе го спасам она што е хромо, ќе ги соберам расеаните и ќе им дадам чест и слава во секоја земја каде што беа посрамени.

Во она време ќе ве доведам, во она време ќе ве соберам вас, зашто ќе ве направам прочуени и почитувани меѓу сите народи на земјата, кога ќе ја обновам вашата благосостојба пред вашите очи, вели Господ.